“Merkataritzak bizia ematen die herri eta hiriei. Gure negozioen erakusleihoek eta fatxadek oinezkoen arreta erakarriko duen zokalo komertzial erakargarria osatu behar dute.”
Erakusleihoa gure aurkezpena da. Lehen inpaktu bisuala da eta, beraz, bezeroaren arreta bereganatu behar du. Barruan zer aurkituko dugun iragartzen du.
Kontuan hartu beharreko lehen faktorea gure lokalaren kokapena da. Gainerako lokaletatik bereizi behar gara, fatxadaren koloreagatik, argiztapenagatik edo errotuluagatik.
Erakusleihoaren diseinua baldintzatzen duten faktoreak, alde batetik, foku-puntuaren determinazioa, hau da, ikusleak begiratzea nahi dugun tokian, eta, bestetik, azaldutako artikuluek osatzen duten konposizioaren forma eta bertan sartutako objektuen kopuruak dira. Arreta berezia jarri behar diogu argiztapenari, foku-puntua eta ikusgai dauden objektuen ezaugarriak nabarmentzeko.
Gure erakusleihoaren aurretik sarri pasatzen diren pertsonen arreta bereganatzeko, 10 edo 15 egunean behin, gutxi gorabehera, errotazio bat egotea funtsezkoa da, eta, jakina, beti garbi eta ordenatuta egon behar du.
Produktu gutxi erakuts ditzakegu adimena erabiliz, edo asko modu sortzailean multzokatuta. Saltzen dugunari balioa emango dion eta lokalaren barrualdean aurkituko dugunarekin koherentea izango den eszena bat lortzea da kontua. Ikuslea sartzera bultzatuko duen erakusleiho kontzeptual bat aukeratu ahal izango dugu, bere jakin-mina piztea lortu dugulako, edo saltzen dugun produktua argi eta garbi ikusten den erakusleiho bat; kasu honetan, produktua eta atrezzoa jartzea da bereziki zaindu behar duguna. Erabilitako atrezzoak agerian dagoen produktua nabarmendu behar du.
Egin behar duguna jakitea bezain garrantzitsua da egin behar ez duguna jakitea. Arreta berezia jarri erabiltzen dugun atrezzoari, honek ezin du produktua ezkutatu, ezta garrantzia kendu ere. Erakusleihoa ez txandakatzeak utzikeria eta berritasunik eza nabarmentzen du negozioan.
Erakusleiho fisikoaz gain, erakusleiho birtual bat dugu orain, sare sozialak. Honek fisikoaren jarraibide eta koherentzia berak jarraitu behar ditu. Bizimodu bat transmititu behar du, eta horrekin guztiarekin kanal anitzeko marka-irudi bat lortu. Lokalaren barruko bisualak sortzeko prozesuak erabili ahal izango ditugu, hala nola erakusleiho fisikoak aldatzea, gure sare sozialetarako edukia sortzeko, erakusleiho birtuala elikatzeko eta erosteko beharra sortzeko.
