HELBURUAK
2022ko abenduaren 1ean Retail Euskal Eskolaren lehenengo Work Café egin genuen Gipuzkoako Bazkundean, eta Gipuzkoako merkatari talde txiki batekin enpresa guztiak kezkatzen dituen gai bat landu genuen: bezeroak.
Work Café horretako helburu nagusien artean zegoen parte-hartzaileek, euren saltokietan erabiltzen dituzten ideiak, proposamenak, ekimenak, estrategiak eta abar partekatuz, sektore ezberdinetan lan egiteko modu ezberdinak ezagutzea eta hobetzea, ezagutzak estrapolatzen saiatuz, era horretara euren errealitateetan aplikatu ahal izateko. Hasieratik bukaerara ezagutza merkatariek partekatu zuten merkatarientzat.
SALTOKI PARTE-HARTZAILEAK:
NESS BY ESTI GARCIA
PERLOTI
CALZADOS KORO
CUCHILLERÍA NAVARRO
LAUKKA
BURBUJAS Y MÁS
ONDORIOAK
Enpresen bilakaera
Parte-hartzaile bakoitzaren aurkezpenaren ondoren, berehala heldu zitzaion bat-batean sortu zen lehenengo gaiari: enpresek bezeroen aurrean identifikatzeko zuten merkataritza-izenaren bilakaera. Ondorio gisa ezarri zen kontsumitzaileek une bakoitzen dituzten eskakizunen arabera joan behar dela aldatzen, eta horietara egokitu behar dela. Denboran zehar izandako bilakaerari lotuta, eta gure bezeroek une bakoitzean dituzten premien arabera, negozio-eredua egokitzearen garrantziaz ere hitz egin zuten. Alde horretatik, enpresak malgua izan behar du, eta erosleek une bakoitzean eskatzen dutenera moldatu behar du.
Serbitizazioa
Bertan zeuden merkatari guztiek adierazi zuten produktuei balio erantsia ematen dieten zerbitzuak eskaintzeko obligazio-sentimendua. Alde horretatik, enpresari bakoitzak bere errealitatean (bere dendan, bere bezeroekin eta produktuarekin) egiten zuenari buruzko hainbat ideia bota zituzten, eta, modu horretan bata bestearen ideiak hartu zituzten bakoitzak bere negozioan ezartzeko. Ikusi ahal izan genuen sektore jakin batean aspalditik ondo funtzionatzen zuena beste batzuetan oraindik ezarri gabe zegoela, eta ekimen ezberdinak partekatu izanari esker hasiko direla baloratzen jardunbide berri horiek gauza daitezkeen.
Bezeroak fidelizatzea
Bileran aztertu zen beste gai nagusietako bat bezeroak fidelizatzearena izan zen. Alde horretatik, behin berriro ere, enpresa bakoitzak bere teknikak, ezberdinak, zituela ikusi zen. Horien artetik, nabarmenduko genuke establezimendu bakoitzak datu-baseei ematen dien erabilpen ezberdina, denda bakoitzak deskontu-kodeak erabiltzeko modua, bezeroei noizbehinka egiten dizkieten opariak edo interakzioa sare sozialen bidez. Horiek guztiak bezero-motaren arabera aldatzen ziren, baina, behin berriro ere, proposamen bakoitzetik beste sektore batean aplikatzeko ondorio bat atera zen.
Bezeroekiko hurbiltasuna eta pertsonalizazioa
Hala eta guztiz ere, bertan zeuden guztiak ados agertu ziren adieraztean bezeroekiko hurbiltasuna mantendu behar dela, bezeroen arazoak entzuten saiatu behar dela konponbide bat emateko, produktuak eta mezuak ahalik eta gehien pertsonalizatzeko ahalegina egin behar dela, eta abar. Azken puntuan teknologia berrien bidez, hala nola, sare sozialen edo WhatsApp Business bidez, ezartzen den harremana landu zen batez ere. Atal honetan “enpresa humanizatzea” esapidea gailendu zen.
Bezero berriak erakartzea
Beste puntu garrantzitsu batean enpresa bakoitzak bezero berriak erakartzeko modua ere landu zen. Alde horretatik, kasu honetan ere, teknika ezberdinak entzun ziren, eta, batez ere, xede den bezeroaren adinaren arabera aldatzen ziren. Hainbat ekintza planteatu ziren: in situ ekitaldiak, aldian behingo sustapenak eta, batez ere, ekintzak sare sozialen bidez gazteak erakartzeko.