HELBURUAK
Jarduera-sektore ezberdinetako saltokien arteko networking formatu honi esker ezagutza, esperientziak eta jardunbide egokiak partekatu ahal izango dira, bai eta bakoitzak dituen kezkak ere. Horrez gainera, lankidetza, eta hala egokitzen bada, sinergiak sortzea sustatuko da.
Bestalde, ekimenari esker merkataritzaren eta zerbitzuen sektoreko enpresen arteko harremana estutu ahal izango da, eta bakoitzak bere ibilbide profesionalean ikasi duena eta egin dituen okerrak partekatu ahal izango dira.
COMERCIOS PARTICIPANTES:
Ana Cristina Estivariz
Cariella By CG
CleanUp BIO
Cotton Artean (hizlaria)
Ibañez Ceremonia
Panadería Amaya
ONDORIOAK
Bezeroak negozioaren ardatza izatearen garrantzia, arreta egokia eta orientazio pertsonalizatua bermatzeko.
Parte-hartzaile guztiek oso argi dute zein den euren negozioen xede-taldearen profila, eta adierazi dute azken urteotan kasu batzuetan aldatu egin dela bezero-mota hori.
Bestalde, adierazi dute batzuetan ez dela erraza izaten bezeroaren lekuan jartzea; izan ere, eguneroko kudeaketak ez du bezeroek zer nahi/pentsatzen duten jakiteko aukerarik ematen. Kasu batzuetan, ez da behar adina denbora hartzen bezeroen premiak eta/edo usteak ongi ulertu ahal izateko.
Beste alde batetik, batzuek adierazi dute garrantzitsua dela xede-taldearen datu-base eguneratua izatea zerbitzu eta aholku hobeak emateko, nahiz eta aipatu duten zailtasunak izaten dituztela datu horiek eskuratzeko. Datu horiek lortzeko normalean erabili ohi duten tresna unean bertan betetzeko jada inprimatuta duten fitxa da (zozketa baterako, izena emateko, sustapen baterako, etab.), eta parte-hartzaileetako batzuek aipatu dute webguneko formularioaren eta online salmentaren bidez ere eskuratzen dituztela.
Parte-hartzaile gehienek arreta sustatzeko eta saritzeko eta bezeroekin WhatsApp Business plataformaren bitartez komunikazio zuzena ezartzeko erabiltzen dituzte datuok, nahiz eta batzuek aipatu duten newsletter bat egiten dutela ere.
Bezeroak HUNKITZEAREN eta zerbitzua edota produktua humanizatzearen garrantzia balio-proposamen gisa.
Aipatu da denda txikiek bezeroei eta gizarteari, orohar, ematen dieten balio erantsiaren ideia, eta parte-hartzaileek adierazi dute balio erantsi horren ardatzak aholkularitza pertsonalizatua eta gertuko tratua, kalitatezko produktua, produktuaren espezializazioa, eta abar direla. Baina hori nahikoa al da?
Galdera horren aurrean, beste hitz batzuk ere aipatu dituzte, besteak beste, emozioa eta zerbitzua humanizatzea, eta gutxi askora denek adierazi dute bi kontzeptu horiek garrantzitsuak direla bezeroek esperientzia ona izatea lortzeko, aurreko paragrafoan aipatutakoekin batera.
Horrez gainera, gure produktuak emozioz, oroitzapenez, irudimenez eta abarrez janztea ere azpimarratu dute, bezeroaren buruan eragin positibo eta ahaztezina sortze aldera. Ba al dakizu zure produktuak zer transmititzen dion bezeroari?
Azkenik, merkataritzaren sektoreak azken urteotan bizi izan duen motibaziorik eza ere aipatu da, baina merkatariek adierazi dute etengabe hobetzen joateko interesa dutela bezeroei euren bertsiorik onena eskaintzeko.
MARKA propio bat edota oso ongi posizionatutako MARKA bat izatearen garrantzia. Bezeroak HUNKITZEA eta zerbitzua edota produktua humanizatzea balio-proposamen gisa.
Denek adierazi dute beharrezkoa dela ongi posizionatutako marka bat izatea; izan ere, merkatua gero eta nabarmenago ari da marka propioko produktuan edota produktuetan espezializatzearen bila.
Merkatariek adierazi dute online eta offline lehia gero eta handiagoa dela, eta bezeroek, beraz, gero eta ordezko produktu gehiago dituztela erosketa egiterakoan, eta horrek dakarrela ongi posizionatutako markaren beharra, prezioen gerra ez baita irtenbidea.
ONLINE PRESENTZIA eguneratua eta fidagarria izatearen garrantzia.
Saltoki guztiek dituzte sare sozialak (Facebook eta Instagram) eta webgune bat, eta kasu batzuetan baita online salmenta ere.
Denak daude gustura sare sozial horien kudeaketarekin; izan ere, negoziotik bertatik kudeatzen dituzte, eta Instagram hartzen ari den garrantzia azpimarratu dute.
Horrez gainera, merkatari guztiak ari dira parte hartzen Retail Euskal Eskola edota eus-Commerce programetan, eta adierazi dute oso pozik daudela, oso lagungarria baitzaie ikasteko eta eduki propioa sortzeko.
Azkenik, denek uste dute omnikanalitatea garrantzitsua dela bezeroekin komunikatzeko eta xede-taldea handitzeko, nahiz eta jabetzen diren lan handia eta denbora asko eskatzen duela emaitza onak lortzeak.
LETENGABEKO FORMAKUNTZAREN garrantzia.
Azpimarratu dute formakuntza negozioaren hazkundearen eta hobekuntzaren zutabeetako bat dela, nahiz eta aipatu duten formakuntza praktikoagoa behar dutela, bakoitzaren neurrira eta premietara egokitua.
Berriz ere aipatu dute, esker onez, aukera aparta dela arlo ezberdinetan formakuntza jasotzea Merkataritza Ganberei, Retail Euskal Eskolari eta eus-Commerceri esker, bai eta Eusko Jaurlaritzako Turismo, Merkataritza eta Kontsumo Sailak merkataritzaren sektorea prestatzeko eta profesionalizatzeko sustatutako beste programa batzuei esker ere.
Sektoreko enpresen arteko LANKIDETZAREN eta ELKARLANAREN garrantzia.
Enpresek uste dute lankidetza eta elkarlana funtsezkoak direla sinergiak sortzeko eta elkarrengandik ikasteko, nahiz eta aipatu duten kasu askotan zailtasunak izaten dituztela.
Eta, amaitzeko, parte-hartzaileek bi ondorio garrantzitsu adierazi zituzten topaketaren amaieran:
- Saltoki batzuk eguberrietako kanpainari begira lankidetza-ideia batzuekin joan ziren, eta teknikari arduradunari kontaktuak eskatu zizkioten.
- Era honetako topaketak sarriago egitea eskatu zuten, sektorean interes handia baitute.